《不沉．曾華倩》

22/07/2004　壹周刊．娛樂名人

中一派位，有男拔萃小六學生寧棄升讀原校，去撲Band 2中學學位。小朋友說，只望脫離高手林立的戰場，不想晚晚發惡夢。

曾華倩，八二年第十二期無線藝訓班畢業，同學是吳君如藍潔瑛商天娥劉嘉玲陶大宇劉青雲吳啟華。廿二年生聚，有人變了阿哥阿姐，也有像商天娥般笠個假髮，扮廿幾年前的師奶，哪管當年她是跟張國榮談情的新紮花旦。

曾華倩也有彪炳「戰績」──在《新紮師兄續集》與梁朝偉卿卿我我，現實裡跟同一個男主角三分三合。現在呢？她是個等五歲半的獨子睡著了，才開幾分鐘車，返港台開咪的離婚婦人。

神氣的曾華倩說，三十幾歲失婚才搏殺，不是為錢。「託賴，我唔使喎。」離婚，事業不如人，她看得透，笑得出。「無線可以打低我。」臭寸當年無線要捧紅的花旦小生一定紅，不過曾華倩沒把握到。「我冇咩事業心，你擺我去天王巨星的位置，我未必覺得正。」她拍了多年電視劇，人家記得的只有《新紮師兄》續集。「果時都唔識做戲，都唔知咩唻。」

初入行，她自認好火爆，試過有記者午飯時找她做訪問，她毫不客氣「寸」人：「家陣我食緊飯，食完至答你好唔好？」工作時又擺出「話之你」的態度，當年重頭劇《楊家將》監製李添勝也投訴她。「佢投訴我玩，唔專心，趕工仲玩。」

在圈中多年，曾華倩依然滿不在乎和刁蠻，同期的藍潔瑛、劉嘉玲都不像她，從未為錢愁。她父親是西醫，在大埔執業，兩個哥哥也是醫生。身為么女的她，自細得寵，又沒壓力。「我地係惡霸、陀地，成日去捉魚仔、擒車底，周圍玩。」曾華倩愛笑，有個朵叫「大笑姑婆」，愛用阿Q精神令自己開心。

講起當日做電視姐仔的風光日子，她笑說：「真係好多（封面）架，影張相已經可以熱賣，幾時輪到Twins。我好犀利架，成日做東南亞夢中情人冠軍，幾時輪到梁詠琪。」

先撇偉仔
曾華倩十分開朗，自信爆棚，問她是不是很難追，她直情說：「係呀，我眼角高嘛，死未。」問她現在再見初戀情人梁朝偉，會否暈浪？她反彈一句：「你覺得佢好靚仔咩？」原來她曾在自己主持的節目上，爆響口說當年是她「撇」偉仔。事後偉仔在報章回應「無所謂」三個字。今日重提舊事，她好有技巧地迴避：「我有講過咩！我提出分手咩！報紙都好信，我唔記得囉。」問他現在見到偉仔有何感覺，她又先哈哈哈大笑一輪才答：「做親訪問，唔多唔少都會『賴』到佢，可能Ｄ人覺得我地『懶』男才女貌、金童玉女。依家大家係老朋友囉。」

雖然她的事業平平，不過她在娛圈廣結人緣。梅艷芳死前她有份衝去醫院，傳藍潔瑛有精神病，她出來說藍好「精靈」。其實在八十年代，她、吳君如、梅艷芳、張曼玉、劉嘉玲、羅美薇、藍潔瑛、邱淑貞、上山詩鈉曾被黃霑封為「九龍女」。「我地從未一齊合照，係一個遺憾，阿梅又唔響度囉。」九龍女中，現在曾華倩比較熟的有嘉玲、君如和藍潔瑛。

帶挈杜汶澤她信佛，信亂說話有口孽，所以她快人快話，但不會踩朋友。就算以前有報導說自從嘉玲同偉仔拍拖後，嘉玲便與她生疏，她亦為嘉玲辯護。「嬲咩呀？我地分手，佢地先一齊架。」兩年前，吳君如約她和劉嘉玲破天荒晚飯，成了娛聞頭條，她就說年初仍有和嘉玲見面，吳君如依然在場。「我地咩都傾，上至天文，下至地理（傾湊仔經？），我地淨係傾溝仔經，成日響度講笑咋。」現在的娛圈紅人，很多是她的好友，只因她對朋友唔話得。她曾與杜汶澤一起在亞視做婦女節目，其後推薦他給吳君如做電台拍檔。「記得當時君如好似搵緊拍檔，我話呢個男仔個腦轉得幾快。」而她更勸杜汶澤，亞視不宜久留，結果離巢的杜汶澤紅了起來。

「唔好講話我係佢大恩人，我覺得每一個地方都有佢的好處，阿澤係ATV出身，唔可以唔感激ATV。」

吳鎮宇、她與吳君如friend足廿年，她說只因二人同樣真夾爽。八十年代抵死的「曾華倩劉嘉玲鹹濕枚」，曾華倩跑步變吳鎮宇（震乳）的歇後語，正是這個老友靠害創作的，她至今仍不忿。「唔講呢個問題，咁肉酸，佢都好似唔係好（身材）得去邊，佢呢Ｄ衰人唻架！」

離婚唔慘
兩年前，她與結婚六年，經營髮廊生意的丈夫林肇基離婚，卻沒令她走到谷底，反而使她重生。

「離婚唔係好慘，最緊要大家�鰫M平氣氛下分開，我地仍然係朋友。」曾華倩重視家庭，但她從不信結了婚必定幸福，所以婚後一直有工作。她說與前夫是因為性格不合分開，與第三者無關，就算有都看得開。

早前她在自己的港台節目《你真超人》中，就曾講過碧咸咁靚仔有錢，覺得他有第三者是理所當然。現在她與五歲半的兒子住值六百萬的九龍塘豪宅，首期是前夫支付；兩母子生活無憂，前夫仍很照顧她們。諷刺地，離婚前她和仔仔拍過奶粉廣告，當選最有說服力母嬰產品代言人，亞軍是吳綺莉。今天她將全副心機放在兒子身上，兒子學滑水、游水，她又一齊去學，閒時亦會拿出廣告影帶欣賞。「我覺得拍到我『懶』係好溫馨。」